اسرائیل اور شام میں جنگ بندی پر اتفاق، سیز فائر ترکیہ اور اردن کی مدد سے ممکن ہوا

دمشق: اسرائیل اور شام کے درمیان کئی روز کی شدید جھڑپوں اور خونریزی کے بعد جنگ بندی پر اتفاق ہو گیا ہے۔

ترکیہ میں تعینات امریکی سفیر تھامس باراک کے مطابق سیز فائر معاہدہ ترکیہ، اردن اور دیگر ممالک کی سفارتی کوششوں سے ممکن ہوا۔ انہوں نے کہا کہ سیز فائر کے بعد تمام فریق ہتھیار ڈالیں اور شام کی تعمیر نو میں حصہ لیں۔

سیز فائر سے قبل شام کے دروز اکثریتی علاقے میں فرقہ وارانہ فسادات اور اسرائیلی حملوں کے نتیجے میں کم از کم 300 افراد جاں بحق اور سینکڑوں زخمی ہوئے۔

تین روز قبل اسرائیل نے دمشق میں وزارت دفاع کے ہیڈکوارٹر کو نشانہ بنایا اور دروز علاقے سے شامی فوج اور دیگر متحارب گروپوں کے انخلا کا مطالبہ کیا تھا۔